මාතර දිස්ත්රික්කයේ ප්රවාහන ක්ෂේත්රයට අදාළ ගැටළු පිළිබඳව සාකච්ඡා කිරීම සඳහා වූ මාතර දිස්ත්රික් ප්රවාහන කමිටු රැස්වීම පසුගියදා මාතර දිස්ත්රික් ලේකම් කාර්යාලයීය ගාමිණී ජයසේකර ශ්රවණාගාරයේදී පවත්වන ලදී.
නව රජයේ ප්රතිපත්තිමය කීන්දුවක් ලෙස ලංකාව පුරා බස් නැවතුම්පොල 50ක් සහ දුම්රිය ස්ථාන 50ක් අංග සම්පූර්ණ පහසුකම් සහිතව ස්ථාපනය කිරීමට යෝජිතය. ඒ හා සමගාමීව මාතර දිස්ත්රික්කයේ මාතර ප්රධාන බස්නැවතුම්පොළ සහ දෙනියාය බස්නැවතුම්පොළ නවීකරණයට අවශ්ය පියවර ගැනීමට අපේක්ෂිත වී ඇත.
මාතර ප්රධාන බස්නැවතුම්පොලට අදාලව තීන්ත ආලේප කිරීම, අලංකරණ පරිසර කලාපයක් ඇති කිරීම, ආවරණ වැට, පොලිස් මුර පොල, සී සී ටී වී පද්ධති, කැලි කසල ක්රමවත්ව බැහැර කිරීම, පරවි ගහණය තුරන් කිරීම, වැසිකිලි පහසුකම් වැඩිදියුණු කිරීම, කාණු පද්ධතිය ක්රමවත් කිරීම, අනවසර කඩකාමර ඉවත් කිරීම, මගී ආසන යතාවත් කිරීම, අධිවේගී බස්නැවතුම්පොළ සඳහා ආවරණ කලාපයක් ඇති කිරීම, ආලෝක පද්ධති නවීකරණය කිරීම, මගී ජනතාවගේ ආකල්ප වැඩි දියුණු කිරීම සඳහා ප්රචාරක සේවා සහ දැන්වීම ප්රදර්ශණය කිරීම ආදී යටිතල පහසුකම් වඩාත් වේගවත්ව සම්පූර්ණ කිරීමට අවශ්ය ඉදිරි පියවර පිළිබඳ මෙහිදී සාකච්ඡා විය. ඒ හා සමගාමීව දෙනියාය බස් නැවතුම් පොල නවීකරණයත් යෝජිත වේ.
මීට අමතරව බස් රථ ප්රවාහනයේදී සිදුවන අක්රමිකතා, ශ්රී ලංගම බස්රථ හා පෞද්ගලික බස් රථ ධාවනයේදී ඊට අදාල ධාවන කාලසටහන් වල සිදුවන අක්රමිකතා සඳහා වඩාත් නිවැරදි හා ක්රමවත් විසඳුම් ලැබෙන සේ යථාවත් කිරීමට අවශ්ය ඉදිරි වැඩපිළිවෙල පිළිබඳ වැදගත් තීරණ තීන්දු රැසක් මෙහිදී ගනු ලැබීය.
ඒ වාගේම ඩීපෝ සංවර්ධනය, සේවක මහතුන්ගේද, මගීන්ගේ ද ආකල්ප සංවර්ධනය, දුරගමනාන්ත රියදුරු හා කොන්දොස්තර මහතුන්ට නිසි විවේකාගාර පහසුකම් සැලසීමත් මගින් වඩාත් සාර්ථක ප්රවාහන සේවයකට අවශ්ය පසුබිම සැලසිය හැකි බව පාර්ලිමේන්තු මන්ත්රී අජන්ත ගම්මැද්ද මහතාගේ අදහස විය.
මාතර, අකුරැස්ස හා හක්මණ යන ඩිපෝවල සිදුවන අක්රමිකතා මග හැරීමට ගතයුතු පියවරයන් පිළිබඳ මෙහි අවධානය යොමු වූ අතර ඒවා වඩාත් ක්රමවත් කළමණාකරනයක් මගින් පවත්වාගෙන යමින් ශ්රී ලංගමය ලාභ ලැබීමේ පරමාර්තයට එහා ගොස් මගී සුබසාධනයට යොමු විය යුතු බව මෙහිදී තීරණය විය.
මෙම අවස්ථාවට මාතර දිස්ත්රික් පාර්ලිමේන්තු මන්ත්රී වරුන් වන මහාචාර්ය එල්. එම්. අබේවික්රම මන්ත්රී තුමා, ලාල් ප්රේමනාත් මන්ත්රී තුමා, මාතර දිස්ත්රික් ලේකම් / දිසාපති චන්දන තිලකරත්න මහතා, අතිරේක දිස්ත්රික් ලේකම් (ඉඩම්) කාංචනා තල්පාවිල මහත්මියත්, මාතර නගරාධිපති ජයන්ත මහතාත්, මාතර දිස්ත්රික් ප්රාදේශීය ලේකම්වරු, දකුණු පලාත් ආණ්ඩුකාරතුමාගේ පෞද්ගලික ලේකම් බණ්ඩාර මහතාත්, ප්රවාහන ක්ෂෙත්රයේ, පොලීසියේ හා නාගරික සංවර්ධන අධිකාරිය යන ක්ෂේත්ර වල ඉහල නිලධාරීන් ඇතුලු රාජ්ය සේවකයින්, දේශපාලන ක්ෂේත්රයේ ප්රාදේශීය නියෝජිතයින් බොහෝ පිරිසක් සහභාගි වී සිටියහ.
මෙම වැඩසටහන මාතර දිස්ත්රික් ලේකම් කාර්යාලීය සැලසුම් අංශය විසින් සංවිධානය කර තිබුණි.
