මාතර දිස්ත්‍රික් විගණන හා කළමණාකරණ කමිටු රැස්වීම, කමිටුවේ සභාපති මාතර දිස්ත්‍රික් ලේකම් ගනේෂ අමරසිංහ මහතාගේ ප්‍රධානත්වයෙන් මාතර දිස්ත්‍රික් ලේකම් කාර්යාලයීය ගාමිණී ජයසේකර ශ්‍රවණාගාරයේ දී 2024.7.10 දින පැවැත්විණි.

මෙහි දී පසුගිය විගණන කළමණාකරණ කමිටු රැස්වීමේ සාකච්ඡා කරන ලද කරුණුවල ප්‍රගතිය, අභ්‍යන්තර විගණන කටයුතු පසුවිපරම, විගණකාධිපති විගණන විමසුම් පසු විපරම, නව විගණන විමසුම් හා අභ්‍යන්තර විගණන උපදෙස් වාර්තා පිළිබඳව සාකච්ඡා කෙරිණි.

මේ අවස්ථාවට මාතර අතිරේක දිස්ත්‍රික් ලේකම් (පාලන) කුසලක නානායක්කාර මහතා, අතිරේක දිස්ත්‍රික් ලේකම් (ඉඩම්) කාංචනා තල්පාවිල මහත්මිය, ‍ඡ්‍යේෂ්ඨ සහකාර විගණකාධිපති කේ.එම්.ජයසිංහ මහතා, විගණන අධිකාරී බී.එම්.සිසිර කුමාර මහතා, සහකාර විගණන අධිකාරී එන්.ඩබ්.කේ.එන්.ඩබ්.නානායක්කාර මහත්මිය,ප්‍රධාන අභ්‍යන්තර විගණක ජී.ජී.ආර්.පී.රූපසිංහ මහතා, වැඩ බලන ප්‍රධාන ගණකාධිකාරි පී.එස්.ඒ.කුමාරි මහත්මිය, මාතර දිස්ත්‍රික්කයේ ප්‍රාදේශිය ලේකම්වරු, සහකාර ප්‍රාදේශිය ලේකම්වරු, ගණකාධිකාරීවරු ඇතුළු රාජ්‍ය නිලධාරීන් පිරිසක් සහභාගි වී සිටියහ.

 පරිසර දිනයට සමගාමීව මාතර දිස්ත්‍රික් ලේකම් / දිසාපති ගනේෂ අමරසිංහ මහතාගේ ප්‍රධානත්වයෙන් ජුනි මස 12 දින මාතර - නිල්වලා ගඟබඩ උද්‍යානයේ දී මඟුල් කරඳ පැළ 50 ක් රෝපණය කිරීම සිදු කෙරිණි.

ජාත්‍යන්තර පරිසර දිනය ජුනි 05 දිනට යෙදී තිබෙන අතර "කාන්තාර ඇති වීම වළක්වා - නැවත සරුසාර බිමක් ඇති කිරීම" මෙවර ජගත් පරිසර දිනයේ තේමාව වී තිබේ. මෙවර ජගත් පරිසර දින ජාතික සැමරුම් උළෙල වෙනුවෙන් පැළ දස ලක්ෂයක් දිවයින පුරා රෝපණය කරන අතර මාතර දිස්ත්‍රික්කයේ ද ස්ථාන රැසක රුක් රෝපණ වැඩසටහන් පැවැත්වේ.

පාරිසරික ගැටලු සම්බන්ධව ලෝක ප්‍රජාවගේ අවධානය යොමු කිරීමේ අදිටනින් 1972 වර්ෂයේදී ස්වීඩනයේ ස්ටොක්හෝම් නුවරදී පැවති ජාත්‍යන්තර පරිසර සමුළුවේදී ගන්නා තීරණයකට අනුව බිහිවූ එක්සත් ජාතීන්ගේ පරිසර වැඩසටහනේ (UNEP) සමාරම්භක දිනය සැමරීම උදෙසා, සෑම වසරකම ජූනි 05 ජගත් පරිසර දිනය වශයෙන් නම්කර ඇත. ඒ අනුව 1973 වසරේ සිට ජූනි 5 වන දා සිට ලෝක පාරිසරික දිනය සමරයි.

ශ්‍රී ලංකාව ද පාරිසරික ගැටලු රැසකට මුහුණ දෙමින් සිටින අතර එක්සත් ජාතීන්ගේ සංවිධානයේ මැදිහත්වීමෙන් එම ගැටලු සමනය කිරීම සඳහා ව්‍යාපෘති ක්‍රියාත්මක වන අතර වසර 2030 වන විට ශ්‍රී ලංකාවේ වනාත්නර ප්‍රතිශතය 32%ක් දක්වා ඉහළ නැංවීමේ ව්‍යාපෘතියක් ක්‍රියාත්මක වේ.

මෑතක සිට දේශගුණ විපර්යාස වැඩිවෙමින් පවතින අතර වසර 2000 සිට නියඟ 29%කින් ඉහළ ගොස් තිබේ. එක්සත් ජාතීන්ගේ නිල වෙබ් අඩවියේ දක්වා ඇති අන්දමට වසර 2050 වන විට ලෝක ජනතාවගෙන් 1/3කට අධික පිරිසකට නියඟය බලපානු ඇත.

මේ අවස්ථාවට මාතර අතිරේක දිස්ත්‍රික් ලේකම් කසුන් වැල්ලහේවා මහතා, අතිරේක දිස්ත්‍රික් ලේකම් (ඉඩම්) නිශාන් පතිරණ මහතා, ජාතික පොහොර ලේකම් කාර්යාලයේ මාතර දිස්ත්‍රික් සහකාර අධ්‍යක්ෂ කීර්ති අබේසිංහ මහතා ඇතුළු පිරිසක් සහභාගි වී සිටියහ.

මාතර දිස්ත්‍රික්කය සඳහා අලුතින් පත් කරන ලද මාතර අතිරේක දිස්ත්‍රික් ලේකම් (පාලන) කුසලක නානායක්කාර මහතා සහ අතිරේක දිස්ත්‍රික් ලේකම් (ඉඩම්) කාංචනා කේ. තල්පාවිල මහත්මිය පසුගියදා  මහා සංඝරත්නයේ සෙත්පිරිත් ආශිර්වාද මධ්‍යයේ රාජකාරි ආරම්භ කෙරුණි.

කුසලක නානායක්කාර මහතා 2006 වර්ෂයේ සිට මුලටියන, පස්ගොඩ, මාතර යන ප්‍රාදේශිය ලේකම් කාර්යාලවල සහකාර ප්‍රාදේශිය ලේකම් ලෙසත්, 2012 වර්ෂයේ සිට එතුමා හක්මණ, කිරින්ද - පුහුල්වැල්ල, කඹුරුපිටිය හා ගාල්ල දිස්ත්‍රික්කයේ හබරාදුව යන ප්‍රාදේශිය ලේකම් කාර්යාලවල ප්‍රාදේශිය ලේකම් ලෙසත් කටයුතු කරන ලදි.

කාංචනා කේ. තල්පාවිල මහත්මිය 2007 වර්ෂයේ සිට තංගල්ල ප්‍රාදේශිය ලේකම් කාර්යාලයේ සහකාර ප්‍රාදේශිය ලේකම් ලෙසත් 2012 වර්ෂයේ සිට 2017 දක්වා කාල සීමාව තුළ ඕකේවෙල හා බෙලිඅත්ත ප්‍රාදේශිය ලේකම් කාර්යාලවල ප්‍රාදේශිය ලේකම් ලෙසත් සේවය කල අතර එතුමිය 2020 වර්ෂයේ මාතර මහ නගර සභාවේ නාගරික කොමසාරිස් තනතුරේ සේවය කරන ලදි. 2024 වර්ෂයේ සිට වැලිපිටිය ප්‍රාදේශිය ලේකම් ලෙස නව තනතුරට පත්ව එන තෙක් එහි රාජකාරි ඉටු කරන ලදි.

මාතර හිටපු අතිරේක දිස්ත්‍රික් ලේකම් (පාලන) කසුන් එස්.කේ. වැල්ලහේවා සහ අතිරේක දිස්ත්‍රික් ලේකම් (ඉඩම්) නිශාන් පතිරණ යන මහත්වරුන් පසුගියදා උසස්වීම් ලබා නික්ම ගිය පසු පුරප්පාඩු වු එම තනතුරු සඳහා නව අතිරේක දිස්ත්‍රික් ලේකම්වරු දෙපළ පත්වූහ.

මේ අවස්ථාවට මාතර දිස්ත්‍රික් ලේකම් ගනේෂ අමරසිංහ මහතා, සහකාර දිස්ත්‍රික් ලේකම් ලක්මාලි තේනුවර මහත්මිය  ඇතුළු රාජ්‍ය නිලධාරින් පිරිසක් සහභාගි වී සිටියහ.

මාතර දිස්ත්‍රික්කයට බලපා ඇති අධික වර්ෂාපතනය හේතුවෙන් ඇති වී තිබෙන ආපදාවන් පිළිබඳව සාකච්ඡා කිරීම සඳහා වූ විශේෂ ආපදා කළමනාකරණ කමිටු රැස්වීමක් දකුණු පළාත් ආණ්ඩුකාර ලක්ෂ්මන් යාපා අබේවර්ධන මහතාගේ ප්‍රධානත්වයෙන් අද (02) දින මාතර දිස්ත්‍රික් ලේකම් කාර්යාලයීය ගාමිණී ජයසේකර ශ්‍රවණාගාරයේ දී පැවැත්විණි.

මෙහි දී ආණ්ඩුකාරවරයා අවධාරණය කරන ලද්දේ ඉදිරි දින දෙක ඇතුළත ඇතිවන වර්ෂා තත්ත්වය සහ දැනට පවතින ගංවතුර තත්ත්වය පහළට ගලා ඒමේ දී මාලිම්බඩ, තිහගොඩ හා මාතර ප්‍රාදේශීය ලේකම් කොට්ඨාස වල ඇතිවිය හැකි ගංවතුර තත්ත්වයට මුහුණදීම සඳහා සැලසුම් සකස් කර ඇති බවයි. දැනට පවතින ගංවතුර තත්ත්වයට සහ ඉදිරියේ දී ඇතිවිය හැකි ගංවතුර තත්ත්වය වෙනුවෙන් ආපදාවට පත්වන පිරිස් සඳහා සුරක්ෂිත මධ්‍යස්ථාන දාහතරක් ඇති කිරීමටත් අවශ්‍යයතා මත තවදුරටත් සුරක්ෂිත මධ්‍යස්ථාන ඇති කිරීම සඳහා පාසල් ලබා ගැනීමටත් සැලසුම් සකස් කර ඇති බව සහ ආපදාවට ලක්වන පිරිස් සඳහා පිසූ ආහාර සහ වියළි ආහාර ලබාදීමට අවශ්‍ය සැලසුම් සකස් කර ඇති බව ද අවධාරණය කෙරිණි.

සහන සැලසීමේ කටයුතු සඳහා දිස්ත්‍රික් ආපදා කළමනාකරණ සම්බන්ධීකරණ ඒකකය,ශ්‍රී ලංකා නාවික හමුදාව සහ පොලිසියේ සහාය ද ලබාගෙන ඇති අතර සහන කටයුතු සඳහා ජනාධිපතිවරයා විසින් අවශ්‍ය ප්‍රතිපාදන දිස්ත්‍රික් ලේකම්වරයා වෙත මේ වන විට ලබා දී ඇතැයි ද අබේවර්ධන මහතා වැඩිදුරටත් පැවසී ය.

අවතැන් වී ඇති පුද්ගලයන්ගේ අවශ්‍යතා, සුරක්ෂිත මධ්‍යස්ථාන පිහිටුවීම සහ එහි අවශ්‍යතා, මෙහෙයුම් කටයුතුවලට අවශ්‍ය හමුදා පිරිස්, යාත්‍රා, රථ වාහන සහ උපකරණ, අත්‍යවශ්‍ය සේවාවන් පවත්වාගෙන යාමට එම ආයතන අතර සම්බන්ධීකරණය, ඇති විය හැකි අනතුරු පාලනය කර ගැනීමේ සැලසුම් සහ මූල්‍ය අවශ්‍යතා පිළිබඳව එහිදී සාකච්ඡා කිරීමත් අවශ්‍ය මුල්‍ය සහ අනෙකුත් සම්පත් මධ්‍යම රජය සහ පළාත් සභාව මගින් දිස්ත්‍රික් ලේකම් කාර්යාලයට,ප්‍රාදේශීය ලේකම් කාර්යාලවලට, පළාත් පාලන ආයතනවලට සහ ආපදා කළමණාකරන මධ්‍යස්ථානයට ලබා දීම සහ අනුමැතිය ලබා දීම පිළිබඳව අවධානය යොමු කරන ලදි.

මේ අවස්ථාවට මාතර දිස්ත්‍රික් සිවිල් සමාජ සංවිධාන සම්මේලනයේ සභාපති යටලමත්තේ විපස්සි නාහිමි, විදුලිබල හා බලශක්ති අමාත්‍ය කංචන විජේසේකර මහතා, මාතර දිස්ත්‍රික් සම්බන්ධීකරණ කමිටුවේ සම සභාපති, පාර්ලිමේන්තු මන්ත්‍රී නිපුණ රණවක මහතා ඇතුළු ප්‍රදේශයේ ජන නියෝජිතයින් මාතර දිස්ත්‍රික් ලේකම් / දිසාපති ගනේෂ අමරසිංහ මහතා ඇතුළු අදාළ රාජ්‍ය නිලධාරීන් හා රාජ්‍ය නොවන සංවිධාන නියෝජිතයින් ඇතුළු පිරිසක් සහභාගි වී සිටියහ.