- You are here:
-
Home
- News
මාතර දිස්ත්රික් සම්බන්ධීකරණ කමිටු රැස්වීම, කමිටුවේ සභාපති කර්මාන්ත හා ව්යයවසායකත්ව සංවර්ධන ගරු අමාත්ය සුනිල් හදුන්නෙත්ති මහතාගේ ප්රධානත්වයෙන් මාතර දිස්ත්රික් ලේකම් කාර්යාලයීය ගාමිණි ජයසේකර ශ්රවණාගාරයේ දී පැවැත්විණි.
කාර්යක්ෂම හා ජනහිතකාමි රාජ්ය සේවයක් සඳහා රාජ්ය සේවකයින්ගේ කාර්යයන් වඩාත් ඵලදායි ලෙස පොදු මහජනතාවට ලබාදීමට නම් රාජ්ය සේවකයන් තෘප්තිමත් විය යුතු අතර ඊට අදාළ වැටුප් වැඩි කිරීම අප්රේල් මස වැටුපට එකතු කිරීම රාජ්ය සේවකයන් ලද මහත් ජයග්රහණයක් බව කමිටු සභාපතිතුමා අදහස් දක්වමින් පැවසී ය.
සුවබර හා හිතකර ජීවිතයක් ගතකිරීමේ අරමුණින් පිරිසිදු පරිසරයක් නිර්මාණය කිරීමේ Clean Sri Lanka වැඩසටහනට අදාළව මාතර දිස්ත්රික්කයේ දුම්රිය ස්ථානවල යටිතල පහසුකම් සංවර්ධනය කරමින් විවේකාගාර, වැසිකිලි පද්ධතිය, ආපන ශාලා වැඩිදියුණු කිරීමත්, අවට පරිසරය තීන්ත ආලේප කර පිරිසිදු තත්ත්වයෙන් පවත්වාගෙන යෑම සඳහා දිසාපතිතුමාගේ මැදිහත් වීම අගය කළ අතර ඒවායෙහි වර්තමාන තත්ත්වය පිළිබඳව සුනිල් හදුන්නෙත්ති අමාත්යවරයාගේ අවධානය යොමු විය.
සංචාරක ක්ෂේත්රය ඉහළ නැංවීම අරමුණු කරගනිමින් ක්රියාත්මක කිරීමට අදාළව යෝජිත මිරිස්ස, දික්වැල්ල, හිරිකැටිය, පොල්හේන, වැලිගම ප්රදේශ වලට අදාළ සංවර්ධන කටයුතු වෙනුවෙන් ඉඩම් අත්පත් කරගැනීම සඳහා එහි නීතිමය කටයුතු කඩිනම් කරගනිමින් ඊට අදාළ වැඩසටහන් වඩ වඩාත් කාර්යක්ෂමව සිදුකර අවසන් වාර්තාව ලබා ගනිමින් එම ව්යාපෘති ක්රියාත්මක කිරීමට අවශ්ය කඩිනම් ක්රියාමාර්ග ගන්නා ලෙස නාගරික සංවර්ධන අධිකාරියටත්, මාතර මහනගර සභාවටත්, ප්රාදේශිය ලේකම් කාර්යාල වලටත් වගකීම් පැවරීමට කමිටු සභාපතිතුමා පියවර ගන්නා ලදි.
එමෙන්ම යෝජිත පොල්හේන ජාත්යන්තර ක්රීඩා පුහුණු පාසලට අදාළ කාර්යයන්හි වර්තමාන තත්ත්වය ද සභාපතිතුමාගේ අවධානයට ලක්විය.
දිස්ත්රික්කයේ ආරක්ෂාව සඳහා අත්යවශ්යම නගර හඳුනා ගනිමින් ඊට සමගාමීව ඩ්රෝන කැමරා භාවිතයෙන් නගර ආරක්ෂා කරගනිමින් මිනීමැරුම් හා මත්ද්රව්ය ව්යාපාර අඩපණ කිරීමට ගතහැකි පියවරයන් ගැන අවධානය යොමු කර ඊට අවශ්ය කටයුතු කඩිනම් කරන ලෙස ද අවධාරණය කෙරිණි.
පාසල්වල පිරිසිදු කිරීමට දෙමාපියන්ගෙන් මුදල් එකතු කිරීම් නවතා සනීපාරක්ෂක කම්කරු නිලධාරින් යොමුකර අදාළ ක්රියාවන් සම්පුර්ණ කර ගැනීමට විදුහල්පතිවරුන් ඇතුළු ආචාර්ය මණ්ඩලය පියවර ගත යුතු බවත්, පාසල්වල අභ්යාස සහ ක්රියාකාරකම් Whats App මාධ්ය හරහා ළමයින්ට යොමුකර ළමුන්ට අමතර පීඩනයක් ඇති කිරීම වහාම නතර කළ යුතු බව කාන්තා හා ළමා කටයුතු අමාත්ය සරෝජා පෝල්රාජ් මහත්මිය අදහස් ඉදිරිපත් කරමින් ප්රකාශ කර සිටියා ය.
දිස්ත්රික්කයේ ගංවතුර අවදානම පිළිබඳව පසුගියදා ජනාධිපතිතුමාගේ මුලිකත්වයෙන් කොළඹ දී පැවති රැස්වීමේ දී ඊට අදාළ බොහෝ විසදුම් සමගින් සාධනීය පියවරයන් රැසක් ගත්බව පාර්ලිමේන්තු මන්ත්රී එම්.එල්. අබේවික්රම මහතා ප්රකාශ කර සිටියේය.
එසේම මැද්දවත්ත වී ගබඩා ගොඩනැගිල්ල මාතර දිස්ත්රික් ගෘහස්ත ජිම්නාස්ටික් පුහුණු ආයතනයක් පවත්වා ගෙන යාම සඳහා පවරාදීමට අවශ්ය පියවර ගන්නා ලෙස දැනුම් දෙන ලදි.
නිල්වලා ගග ආශ්රිත පිරිසිදු කිරීම් හා “Save Nilwala” වැඩසටහනට අදාළ වත්මන් තත්ත්වය හා එය වඩාත් සාර්ථක කර ගැනීමට ගත යුතු පියවරයන් ගැන අවධානය යොමු කෙරිණි.
එළඹෙන සිංහල හා දෙමළ අලුත් අවුරුද්දට සමගාමීව නගර සභා, ප්රාදේශිය සභා අනුමැතියට යටත්ව තාවකාලීක කඩ ලබාදීමට පියවර ගන්නා ලෙසත් ඊට අදාළ සම්පුර්ණ ආරක්ෂක කටයුතු පිළිබඳව මේ වන විටත් අවධානය යොමු කර ඇති බව ද අවධාරණය කරන ලදි.
මාතර දිස්ත්රික්කයේ ක්රියාත්මක කරන ලද සංවර්ධන වැඩසටහන්වල ප්රගතිය හා ගැටලු පිළිබදව සාකච්ඡා කිරීම, දිස්ත්රික්කයේ ආරක්ෂක කටයුතු, රාජ්ය පරිපාලන, පළාත් සභා හා පළාත් පාලන කටයුතු මුදල් ක්රම සම්පාදන හා ආර්ථික සංවර්ධන කටයුතු , කෘෂිකර්ම, පශු සම්පත්, ඉඩම් සහා වාරිමාර්ග කටයුතු, ප්රවාහන හා මහාමාර්ග කටයුතු, ධීවර, ජලජ හා සාගර සම්පත් කටයුතු, කම්කරු කටයුතු, වැවිලි හා ප්රජා යටිතල පහසුකම් කටයුතු, නාගරික සංවර්ධන, ඉදිකිරීම් හා නිවාස කටයුතු, හා ජනමාධ්ය කටයුතු වෙළද වානිජ කටයුතු කෙරෙහි අවධානය යොමු විය.
මේ අවස්ථාවට කාන්තා හා ළමා කටයුතු ගරු අමාත්ය සරෝජා පෝල්රාජ් මහත්මිය, මාතර දිස්තික් නියෝජනය කරන සියලුම පාර්ලිමේන්තු මන්ත්රීවරු, දකුණු පළාත් ප්රධාන ලේකම් සුමිත් අලහකෝන් මහතා, මාතර දිස්ත්රික් ලේකම් / දිසාපති චන්දන තිලකරත්න මහතා ඇතුළු මාතර දිස්ත්රික් ලේකම් කාර්යාලයේ නිලධාරින්, ප්රාදේශිය ලේකම්වරු, දෙපාර්තමේන්තු, අමාත්යාංශ, සංස්ථා, මණ්ඩල නියෝජනය කරමින් එහි ප්රධානීන්, සෞඛ්ය අංශ, පොලිසිය, මාධ්යවේදීන් ඇතුළු පිරිසක් සහභාගී වී සිටියහ.
මාතර දිස්ත්රික් ලේකම් කාර්යාලීය ක්රම සම්පාදන අංශය විසින් රැස්වීම සංවිධානය කරන ලදි.
“අනාගත නායකයින් සඳහා සමථකරණය” වැඩසටහන් මාලාවට සමගාමීව අනාගත නායකයින් ලෙස පාසල් සිසු සිසුවියන් නායකත්ව ලක්ෂණ වර්ධනය කර ගන්නා ආකාරය, අභියෝග සඳහා සාර්ථකව මුහුණ දීම, ආකල්ප සංවර්ධනය, ගැටුම් නිරාකරණය තුළින් සමථකරණය කරා ළඟාවන ආකාරය යනාදිය පිළිබඳව න්යායාත්මක හා ප්රායෝගික ක්රියාකාරකම් සහිතව කිරින්ද - පුහුල්වැල්ල ප්රාදේශීය ලේකම් කොට්ඨාසයේ වලකන්ද මහා විද්යාලයේ සිසු සිසුවියන් දැනුවත් කිරීමේ වැඩසටහනක් පසුගියදා එම විද්යාලයේදී පැවැත්විණි.
මෙහිදී 06,07,08,09,10,11 ශ්රේණි වල ඉගෙනුම ලබන පාසල් සිසු සිසුවියන් කාණ්ඩ 02ක් යටතේ දැනුවත් කිරීම සිදු කරන ලද අතර කිරින්ද - පුහුල්වැල්ල ප්රාදේශීය ලේකම් කාර්යාලයේ සංවර්ධන නිලධාරී(සමථ) පියුමි කංකානම්ගේ මහත්මිය විසින් මේ සඳහා සම්පත් දායකත්වය සපයන ලදී.
ගැටුම් නිරාකරණය හා සමථකරණයේදී පුද්ගලයින් තුළ තිබෙන කායික හා මානසික වෙනස්කම් සැලකිල්ලට ගතයුතු බවත් එම වෙනස් තත්ත්වයන්ම ගැටුම් නිරාකරණය හා සමථකරණය සඳහා යොදාගත යුතු බවත් තවදුරටත් අවධාරණය කෙරිණි.
ප්රබල චිත්තවේග, වැරදි ලෙස සිතීම හා දැකීම, දුබල සන්නිවේදනය හා නැවත නැවත සිදුවන හානිකර හැසිරීම් හේතුවෙන් සම්බන්ධතා ගැටුම් ඇතිවේ. එදිනෙදා පවත්නා සාරධර්ම, අවසාන සාරධර්ම හා ආත්ම විග්රහය පිළිබඳ සාරධර්ම නිසා සාරධර්ම පිළිබඳ ගැටුම් නිර්මාණය වේ. යමක් පවතින ආකාරය, කාර්යභාරය පිළිබඳ විග්රහය, කාලය පිළිබඳ සීමා, භූගෝ විද්යාත්මක හා භෞතික සම්බන්ධතා හා අසමාන වූ බලය හා සම්පත් හේතුවෙන් ව්යුහමය ගැටුම් ඇතිවේ. ද්රව්යමය, ක්රියාපටිපාටිමය හා මනෝවිද්යාත්මක තත්ත්වයන් හේතුවෙන් අවශ්යතා පදනම් කරගත් ගැටුම් නිර්මාණය වේ. තොරතුරු නොමැතිකම, වැරදි තොරතුරු ලැබීම, අදාළ දත්ත කවරේද පිළිබඳව එකඟතාවයක් නොවීම, දත්ත පිළිබඳව විවිධ අර්ථකථන හා විවිධ තක්සේරු කිරීම් හේතුවෙන් දත්ත පිළිබඳ ගැටුම් නිර්මාණය වන බවද පැහැදිලි කරන ලදී. ගැටුම් නිර්මාණය වන ආකාරය පිළිබඳව හඳුනාගැනීම වඩාත් ඵලදායී ගැටුම් නිරාකරණය කිරීමක් සඳහා ඉවහල් වේ.
අධිකරණ අමාත්යාංශයේ සමථ මණ්ඩල කොමිෂන් සභාව මගින් රාජ්ය නිලධාරීන්, පාසල් දරුවන්හා ප්රජාව දැනුවත් කිරීමේ වැඩසටහන් දීප ව්යාප්තව සිදු කරනු ලබයි.
කිරින්ද - පුහුල්වැල්ල විදේශ සේවා නිලධාරී පී. සී. කොඩිකාර මහතාගේ හා තරුණ සේවා නිලධාරී ජානකි විතාරණ මහත්මියගේ දායකත්වයෙන් වලකන්ද මහා විද්යාලයේ විදුහල්පති ජනක කුමාර මහතා, ඒ. එම්. සී. කේ. වීරසිංහ ගුරු මහත්මිය, ආර්. පී. එම්. පූර්ණිමා ගුරු මහත්මිය ඇතුළු අධ්යයන හා අනධ්යන කාර්ය මණ්ඩලයේ සහාය ඇතිව වැඩසටහන සංවිධානය කරන ලදී.
මාතර දිස්ත්රික්කයේ ප්රාදේශීය ලේකම් කොට්ඨාශ මට්ටමින් ක්රියාත්මක කරනු ලබන සංවර්ඛන ව්යාපෘතිවල ප්රගතිය විමසා බැලීම හා ඒ සම්බන්ධයෙන් පවතින විවිධ ගැටළු කෙරෙහි අවධානය යොමු කරමින් 2025 පෙබරවාරි මාසයට අදාළ මාතර දිස්ත්රික් ප්රාදේශීය ලේකම් සාකච්ඡාව මාතර දිස්ත්රික් ලේකම් / දිසාපති චන්දන තිලකරත්න මහතාගේ ප්රධානත්වයෙන් මාතර දිස්ත්රික් ලේකම් නිළ සාකච්ඡා මැදිරියේදී පැවැත්විණි.
මෙහිදී මාතර ප්රදේශීය ලේකම් කොට්ඨාශ මට්ටමින් ක්රියාත්මක කෙරෙන සංවර්ධන වැඩසටහන් පිළිබඳව සහ ඒවායේ පවතින ගැටළු පිළිබඳව සාකච්ඡා කරන ලද අතර අදාළ ගැටළු වෙනුවෙන් ගතයුතු ක්රියාමාර්ග පිළිබඳව අවධානය යොමු කෙරිණි. ප්රාදේශීය ලේකම් කොට්ඨාශ මට්ටමින් පවතින සංවර්ධන ගැටලු, මූල්ය ගැටලු, ඉඩම් ගැටලු, සමෘද්ධි ගැටලු ආදිය පිළිබඳව විශේෂයෙන් සාකච්ඡා කරන ලදී.
ක්ලීන් ශ්රී ලංකා වැඩසටහන, විමධ්යගත අයවැය වැඩසටහන, අස්වැසුම වැඩසටහන ඇතුළු වැඩසටහන් රැසක ප්රගතිය විමසා බැලීමද සිදු කෙරිණි.
මීට අමතරව දිස්ත්රික්කයේ ඉඩම් සම්බන්ධ කටයුතු, අභ්යන්තර විගණන කටයුතු, ගිණුම් කටයුතු, ආපදා සහන සේවා කටයුතු, සමාජ ආරක්ෂණ විශ්රාම වැටුප් යෝජනා ක්රමය පිළිබඳව, සමාජ සේවා කටයුතු පිළිබඳව සාකච්ඡා කරන ලදී.
මේ අවස්ථාවට මාතර අතිරේක දිස්ත්රික් ලේකම්(පාලන) කුසලක නානායක්කාර මහතා, අතිරේක දිස්ත්රික් ලේකම්(ඉඩම්) කාංචනා තල්පාවිල මහත්මිය, මාතර දිස්ත්රික් ලේකම් කාර්යාලයේ නිලධාරීන් හා මාතර දිස්ත්රික්කයේ ප්රාදේශීය ලේකම් කොට්ඨාශ දහසය නියෝජනය කරමින් ප්රාදේශීය ලේකම්වරුන් ඇතුළු පිරිසක් සහභාගි වී සිටියහ.
“තැනුමට තිරසර හෙටක්-සවිමත් ඇය වේ” යන තේමාව යටතේ 2025 ජාත්යන්තර කාන්තා දින සැමරුමට සමගාමී කාන්තා දින වැඩසටහනක් ළමා හා කාන්තා කටයුතු ගරු අමාත්ය සරෝජා පෝල්රාජ් මහත්මියගේ ප්රධානත්වයෙන් මාතර සණස ශ්රවණාගාරයේදී පැවැත්විණි.
මෙහිදී ශ්රී ලාංකේය සමාජය තුළ කාන්තාවගේ භූමිකාව පිළිබඳව හා රටේ ආර්ථිකය නගා සිටුවීම සඳහා කාන්තාවගේ දායකත්වය පිළිබඳව අදහස් ප්රකාශ කරන ලදී. මේ අවස්ථාවට පාර්ලිමේන්තු මන්ත්රී නිලන්ති කොට්ටහච්චි මහත්මිය ඇතුළු කාන්තාවන් පිරිසක් සහභාගි වී සිටියහ.
මාතර පරිපාලන දිස්ත්රික්කයේ අභිනව දිස්ත්රික් ලේකම් / දිසාපති වශයෙන් ශ්රී ලංකා පරිපාලන සේවයේ විශේෂ ශ්රේණියේ නිලධාරියෙකු වන චන්දන තිලකරත්න මහතා රාජකාරි ආරම්භ කිරීම ගරුතර මහා සංඝරත්නයේ සෙත් පිරිත් සජ්ඣායනා මධ්යයේ අද (10) දින මාතර දිස්ත්රික් ලේකම් කාර්යාලයේ දී සිදු කෙරිණි.
මාතර දිස්ත්රික් ලේකම් / දිසාපති වශයෙන් පත්වීමට පෙර ඒ මහතා කටයුතු කරන ලද්දේ සෞඛ්ය හා ජනමාධ්ය අමාත්යංශයේ අතිරේක දිස්ත්රික් ලේකම් වශයෙනි.2000 වර්ෂයේ ශ්රී ලංකා පරිපාලන සේවයට එක්වන ඒ මහතා පළමු පත්වීම 2001 වර්ෂයේ සිට 2009 වර්ෂය දක්වා කොටපොල සහකාර ප්රාදේශිය ලේකම් වශයෙන් ද, 2009 වර්ෂයේ සිට 2021 වර්ෂය දක්වා අකුරැස්ස ප්රාදේශිය ලේකම් වශයෙන් ද, 2021 වර්ෂයේ සිට සෞඛ්ය හා ජනමාධ්ය අමාත්යංශයේ අතිරේක ලේකම් වශයෙන් ද කටයුතු කරන ලදි.
මාතර අභිනව දිස්ත්රික් ලේකම් / දිසාපති චන්දන තිලකරත්න මහතා රාජකාරි ආරම්භ කිරීමේ අවස්ථාවට ගරුතර මහා සංඝරත්නය, අන්යාගමික පූජක තුමන්ලා, මාතර අතිරේක දිස්ත්රික් ලේකම් (පාලන) කුසලක නානායක්කාර මහතා, අතිරේක දිස්ත්රික් ලේකම් (ඉඩම්) කාංචනා තල්පාවිල මහත්මිය ඇතුළු රාජ්ය නිලධාරීන්, ඒ මහතාගේ පවුලේ ඥාතීන් හා හිතවතුන් පිරිසක් සහභාගි වී සිටියහ.
