මාතර දිස්ත්‍රික්කයේ ජීවත්වන කථන හා ශ්‍රවණ ඌනතා සහිත ප්‍රජාව වෙනුවෙන් වූ ගී රසවින්දන හා සාහිත්‍යමය උපදේශන වැඩසටහනක් මාතර දිස්ත්‍රික් ලේකම් / දිසාපති චන්දන තිලකරත්න මහතාගේ ප්‍රධානත්වයෙන් 2025 දෙසැම්බර් මස 17 වන දින මාතර දිස්ත්‍රික් ලේකම් කාර්යාලයීය ගාමිණී ජයසේකර ශ්‍රවණාගාරයේදී පැවැත්විණි.

මෙහිදී සංඥාව භාවිතා කරමින් ගීත රස විඳින ආකාරය,ඔවුන්ගේ ජීවිත ගොඩනගා ගැනීමේදී හා පවත්වාගෙන යාමේදී වැදගත් වන උපදේශනය සහ සමාජීය වශයෙන් හා පෞද්ගලිකව ඔවුන්ට බලපාන ගැටළු සාකච්ඡා කිරීම යනාදිය සිදු කරන ලදී.

“සංඥාව තුළින් ගී රසවින්දනය” සිදු කරන ලද්දේ මහරගම ජාතික අධ්‍යාපන ආයතනයේ බාහිර කථිකාචාර්ය, ප්‍රවීණ සංඥා භාෂා උපදේශක කැළුම් ඉන්දික සමරවික්‍රම මහතා විසින් වන අතර “සාහිත්‍යමය උපදේශනය” සිදු කරන ලද්දේ රුහුණු විශ්ව විද්‍යාලයේ සමාජ විද්‍යා අධ්‍යයන අංශයේ ජ්‍යෙෂ්ඨ කථිකාචාර්ය ගයත්‍රි විජේසුන්දර මහත්මිය විසිනි.

මේ අවස්ථාවට මාතර දිස්ත්‍රික්කයේ මාතර දිස්ත්‍රික්කයේ කථන හා ශ්‍රවණ ඌනතා සහිත ප්‍රජාව, මාතර අතිරේක දිස්ත්‍රික්‌ ලේකම්(ඉඩම්) කාංචනා තල්පාවිල මහත්මිය, දිස්ත්‍රික් සංස්කෘතික නිලධාරී කුමාරසේන ලියනපතිරණ මහතා, දිස්ත්‍රික් සමාජ සේවා නිලධාරී සම්පත් පුෂ්පකුමාර මහතා, සංවර්ධන නිලධාරී (සංස්කෘතික) සුභා විජේගුණසේකර මහත්මිය ඇතුළු රාජ්‍ය නිලධාරීන්, සුමග රුහුණු ශ්‍රවණ ඌනතා සංසදයේ සභාපති දයා ජයවික්‍රම මෙනෙවිය ව්‍යාපෘති කළමනාකරු කසුන් චන්දන මහතා ඇතුළු නියෝජිතයින සහභාගි වී සිටියහ.

සංස්කෘතික කටයුතු දෙපාර්තමේන්තුව මගින් ක්‍රියාවට නංවනු ලබන “දොළොස් මහේ පහන”වැඩසටහන යටතේ මාතර දිස්ත්‍රික‌් ලේකම් / දිසාපති චන්දන තිලකරත්න මහතාගේ සංකල්පයකට අනුව සුමග රුහුණු ශ්‍රවණ ඌනතා සංසදයේ අනුග්‍රහයෙන්, මාතර දිස්ත්‍රික් සමාජ සේවා අංශයේ සම්බන්ධීකරණයෙන් මාතර දිස්ත්‍රික් සංස්කෘතික අංශය මගින් වැඩසටහන සංවිධානය කරන ලදී.

මාතර දිස්ත්‍රික්කයට බලපා ඇති අයහපත් කාලගුණ තත්ත්වය හේතුවෙන් ඇති වී තිබෙන ආපදාවන් පිළිබඳව සාකච්ඡා කිරීම සඳහා වූ විශේෂ ආපදා කළමනාකරණ කමිටු රැස්වීමක් ‍නොවැම්බර් මස 28 දින මාතර දිස්ත්‍රික් ලේකම් කාර්යාලයේ දී පැවැත්විණි.
මෙහි දී රට තුළ පවතින ආපදා තත්ත්වය හමුවේ මාතර දිස්ත්‍රික්කයේ පීඩාවට පත්ව සිටින ජනතාව වෙනුවෙන් සහන සැලසීම හා ආපදා තත්ත්වයට මුහුණදීම සඳහා වැදගත් තීරණ රැසක් ගනු ලැබිණි.
ප්‍රධාන වශයෙන් නිල්වලා ගඟේ ජලය බැසයාම සදහා ලවණ බාධකය අසළ කැපූ විකල්ප ඇළ මාර්ගයේ යොදා ඇති වැලි කොට්ට කඩිනමින් ඉවත් කිරීම සඳහා අවශ්‍ය පියවර ගත් අතර දැනට ආපදා තත්ත්වය හේතුවෙන් අවතැන්ව සිටින පවුල් සඳහා කඩිනමින් සහන සැලසීමට අවශ්‍ය සියලු අංශ දැනුවත් කිරීම සිදුකරන ලදි.
එමෙන්ම විදුලිය බිඳවැටීම්, ජල සැපයුම් අඩාලවීම් සහ මාර්ග අවහිරවීම් කඩිනමින් යථාතත්ත්වයට පත් කිරීමට අදාළ සියලු අංශ වලට උපදසේ ලබාදෙන ලදි.
මේ අවස්ථාවට කාන්තා හා ළමා කටයුතු ගරු අමාත්‍ය සරෝජා සාවිත්‍රි පෝල්‍ රාජ් මහත්මිය, බලශක්ති නියෝජ්‍ය අමාත්‍ය අර්කම් ඉල්යාස් මහතා, මාතර දිස්ත්‍රික් පාර්ලිමේන්තු මන්ත්‍රීවරුන් වන මහාචාර්ය එල්.එම්.අබේවික්‍රම මහතා, අජන්ත ගම්මැද්දගේ මහතා, ලාල් ප්‍රේමනාත් මහතා, මාතර නගරාධිපති නීතිඥ ජයන්ත පතිරණ මහතා, ප්‍රාදේශීය සභා සභාපති වරු, මාතර දිස්ත්‍රික් ලේකම් / දිසාපති චන්දන තිලකරත්න මහතා ඇතුළු රාජ්‍ය නිලධාරීන්, ආපදා කළමනාකරණ අංශ, පොලිසිය ඇතුළු විවිධ අංශ නියෝජනය කරන පිරිසක් සහභාගි වී සිටියහ.